Bára Halldórsdóttir sem tók upp samtal sex þingmanna á veitingastaðnum Klaustur í nóvembermánuði hefur fengið mjög jákvæð viðbrögð við uppátækinu og upplifað mikinn stuðning. Bára sem kom fyrst fram undir dulnefninu Marvin steig fram í viðtali við Stundina fyrir helgi.
Bára segir engan af þeim sex sem sátu á Klaustri umrætt kvöld hafi reynt að hafa samband við sig eftir að hún steig fram. „Ég hef bara upplifað fullt af jákvæðni og stuðning,“ segir Bára í stuttu spjalli við Nútímann.
Þrátt fyrir að hafa upplifað jákvætt umtal eftir að hún steig fram hefur hún orið vör við nokkrar athugasemdir frá fólki á netinu sem er ekki ánægt með uppátækið. „Ég hef bara séð það í athugasemdum á netinu en ég staldra nú stutt við það. Auðvitað má fólk hafa allskonar skoðanir á þessu,“ segir hún.
Einhverjir hafa bent á að hugsanlega geti þeir aðilar sem fram koma í upptökunum sótt Báru til saka. Hún óttast það ekki. „Ég er ekki hrædd við það nei. Ég tek því þá bara,“ segir hún.