Stefán Einar Stefánsson, blaðamaður Morgunblaðsins, er ekki sáttur með gagnrýni á fréttaflutning blaðsins af hálfu Þórðar Snæs Júlíussonar, ritstjóra Kjarnans. Stefán segir að „alvöru fjölmiðlar verði að vara sig á rausi af þessu tagi sem er aðeins gert til þess að klína ógeðfelldum stimplum á fólk.“ Stefán vitnar þarna í pistil Þórðar sem birtist á Kjarnanum í gær.
Sjá einnig: Þórði Snæ hótað eftir gagnrýni á Morgunblaðið:„Vona að þú verðir fyrsti Íslendingurinn til að fá sýrubað“
„Skoðanabloggið Kjarninn hefur nú lýst því yfir að fjölmiðlar megi ekki flytja tilteknar fréttir – þær standast nefnilega ekki pólitískan rétttrúnað forsvarsmanns vefsins,“ skrifar Stefán á Facebook síðu sína. Í Morgunblaði gærdagsins birtist á forsíðunni frétt um hælisleitanda sem safnaði sýru úr rafgeymum en margir telja að fréttaflutningurinn hafi verið villandi og hafi ýtt undir hatur á hælisleitendum.
Stefán hjólar svo í Þórð sem hann segir að hafi lengi verið með Morgunblaðið á heilanum. „En á sama tíma hefur hann þegið fjármagn frá mönnum sem helst hafa orðið frægir fyrir að eiga reikninga og fé á aflandseyjum. Hann gagnrýnir fréttablaðið fyrir að dreifa blöðum frítt um borg og bí en finnst ekkert tiltökumál að gera það sjálfur undir merkjum Mannlífs. Honum finnst allir fífl nema hann sjálfur.“