Brynjar Níelsson, þingmaður Sjálfstæðisflokksins, er hættur á Facebook. Hann tilkynnti þetta nú í morgun. Brynjar á 5.000 vini og segist þykja vænt um þá alla, líka þá sem eru í mismiklu jafnvægi og hafa mikla þörf til að segja sér til syndanna.
„Nú er svo komið að ég ætla, af heilsufarsástæðum, að kveðja Fésbókina að minnsta kosti í bili. Eiginkonan mun gleðjast og kannski láta sjá sig aftur á meðal fólks og margir samflokksmenn mínir munu draga úr notkun róandi lyfja ef það er ekki orðið of seint,“ segir Brynjar.
Brynjar viðurkennir að eflaust eigi hann eftir að sakna Facebook en nú sé komið að lokum. „Ég mun örugglega sakna ykkar, kæru vinir en nú bíð ég bara eftir að einhver kenni mér að loka þessum fjanda.“