Hulda Kristjánsdóttir, íbúi í Flóahreppi, hefur sent Jóni Gunnarssyni samgönguráðherra boð um að rúnta um á slæmum vegum Flóahrepps. Fleiri þingmenn fengu sama boð frá Huldu sem vill vekja athygli á slæmu ástandi vega í hreppnum.
DV greindi frá því í gær að innanríkisráðuneytið hafi fest kaup á nýjum Toyota Land Cruiser 150 VX-jeppa fyrir Jón Gunnarsson. Hulda deildi fréttinni á Facebook-síðu sinni með skilaboðum til Jóns.
„Í tilefni af þessum nýja bíl fyrir ráðherra samgöngu- og sveitarstjórnarmála vil ég bjóða Jóni Gunnarssyni ráðherra að rúnta um á nýja bílnum á vegum í Flóahreppi,“ segir hún.
Væri til dæmis gott að byrja á að keyra Hamarsveg (nr. 308) fara svo Önundarholtsveg (nr. 311). Og ef þú tímir ekki að fara á nýja ráðherrabílnum þá skaltu prufa að fara í þínum einkabíl.
Ástand vega hefur reglulega veri gagnrýnt. Samtök ferðaþjónustunnar lýstu í vikunni yfir miklum vonbrigðum með boðaðan niðurskurð í samgönguáætlun.
„Það er með ólíkindum að þeim nauðsynlegu samgönguframkvæmdum sem ferðaþjónustan hefur ítrekað kallað eftir sé nú enn og aftur ýtt út af borðinu,“ segir þar.