Erlendir risar á borð við Netflix eru búnir að spyrjast fyrir um myndver Baltasars Kormáks í Gufunesi. Þetta kom fram í fréttum RÚV í kvöld.
Baltasar Kormákur skrifaði í vikunni undir samning við Reykjavíkurborg um kaup á lóðum og byggingarrétti á Gufunesi undir kvikmyndaþorp og íbúðabyggð. Samningurinn er upp á 1,64 milljarða króna – 1.290 milljónir fyrir byggingarréttinn og 350 milljónir í gatnagerðargjöld sem greiðast síðar.
Sjá einnig: Svona komst Baltasar Kormákur í þetta klikkaða form: „Balti var mjög einbeittur í verkefninu“
Baltasar sagði í fréttum RÚV að myndverið í gömlu áburðarverksmiðjunni á svæðinu sé eitt það stærsta í Evrópu, um 5.000 fermetrar en Ófærð verður tekin upp þar á næsta ári. „Netflix er farið að hringja í okkur og spyrjast fyrir um hvort það sé laust á ákveðnum tíma,“ sagði hann.
Hann sagði í fréttinni að hugmyndin sé að það byggist upp einhvers konar þyrping. „Þorp þar allskonar skapandi greinar geta þrifist og íbúðahverfi þannig að þetta verði ekki dautt iðnaðarhverfi á kvöldin,“ sagði hann í fréttum RÚV.
„Hugmyndin er að það sé blönduð starfsemi með veitingastöðum. Þannig að þetta verði svona miðbæjarkúltúr í úthverfi.“