Fjarvera kvenna í úttekt um hipp hopp-senuna á Íslandi í nýjasta tölublaði Grapevine er harðlega gagnrýnd á Twitter. Rappararnir í hljómsveitinni Úlfur Úlfur segja að það sé sick að horfa gjörsamlega framhjá framlagi kvenna til senunnar. Höfundur greinarinnar segir að um misskilning sé að ræða; greinin fjalli aðeins um nýja listamenn undir tvítugu og að hún hafi hreinlega ekki fundið neinar konur á þeim aldri sem eru að gera hipp hopp.
Í umfjöllun Grapevine sem kom út í dag fjallar Hannah Jane Cohen um nýliða íslensku hipp hopp-senunnar undir fyrirsögninni: „The Front Line“ eða „Í framlínunni“. Rappararnir sem fjallað er um í greininni eru Birnir, JóiPé & Króli, Landaboi$, Dadykewl, Hrnnr & Smjörvi og Icy G & Hlandri. Loks er Aron Can á forsíðu blaðsins.
Á Twitter hefur málið verið talsvert rætt í dag og á meðal þeirra sem hafa gagnrýnt skortinn á konum í umfjölluninni eru Salka Sól og rappsveitin Úlfur Úlfur.
The next wave: No girls allowed pic.twitter.com/bWaNO9a3Qf
— Heiður Anna (@heiduranna) June 30, 2017
Svona er þetta…? https://t.co/Lge02Ed6Xi
— Salka Sól Eyfeld (@salkadelasol) June 30, 2017
Mad respekk á alla þessa young cats sem grapevine hampar í hástert en það er sick að horfa gjörsamlega framhjá framlagi kvenna til senunnar
— ÚLFUR ÚLFUR!! (@ulfurulfur) June 30, 2017
Hey @rvkgrapevine þið gleymduð öllum stelpunum ? #6dagsleikinn pic.twitter.com/wXOgk1eRXH
— Sunna Ben (@SunnaBen) June 30, 2017
Blaðamaðurinn Hannah Jane Cohen segir í samtali við Nútímann að Grapevine hafi þrisvar á undanförnum misserum fjallað með um hipp hopp og að síðast hafi konur til að mynda verið í meirihluta þeirra sem rætt var við.
Hannah telur að gagnrýnin sé byggð á misskilningi enda hafi í þetta skipti aðeins verið fjallað um listamenn undir tvítugu sem eru að springa út. Hún segist hreinlega ekki hafi fundið konur á þeim aldri sem eru virkar í senunni. „Hvað áttum við að gera, búa þær til?“ spyr hún.
Hún segist vera femínisti og afar meðvituð um að útiloka ekki konur í umfjöllun sinni. „Ég leitaði að stelpum á þessum aldri sem eru að gera þessa tegund tónlistar en ég bara fann engar,“ segir Hannah og bætir við að hún hafi augljóslega ekki viljað hafa reyndari listamenn á borð við rappsveitina Cyber, Reykjavíkurdætur eða Alviu Islandiu í umfjöllun um nýliða. „Það hefði gert lítið úr þeim.“