Guðni Th. Jóhannesson, forseti Íslands, og fjölskylda hans eru flutt á Bessastaði.
Hann hjólaði með börnin í skólann í morgun, líkt og sjá má á Facebook-síðu forsetans. Þar má sjá forsetann, með hjálm og í öryggisvesti, með barnastól á bögglaberanum og hjólavagn í eftirdragi.
Sjá einnig: Fjögur atriði sem stóðu upp úr í framboðsræðu Guðna Th. í mínum huga
„Þá erum við fjölskyldan flutt á Bessastaði. Einstök fegurð blasti við í morgunsárið; geislar morgunsólarinnar lágt á himni, húsin á höfuðborgarsvæðinu sveipuð ljóma, stilltur hafflötur og ferskt loft, fjallahringurinn í fjarska, hrossin úti á túni, álftirnar kvakandi. Þetta er fallegt land, Ísland,“ skrifaði forsetinn.
Þegar Guðni tilkynnti um framboð sitt til forseta Íslands sagðist hann ætla að halda áfram að hjóla í skólann- og leikskólann með börnin, næði hann kjöri.