Guðni Th. Jóhannesson, forseti Íslands, hefur verið gerður að heiðursdoktor við Queen Mary University of London. Þetta kemur fram á vef forsetans.
Guðni stundaði þar doktorsnám og lauk prófum árið 2004. „Athöfnin var öll hin hátíðlegasta,“ segir Guðni á Facebook-síðu sinni.
Maður stenst ekki mátið og leyfir sér að vekja athygli á því að í gær var ég gerður að heiðursdoktor við Queen Mary, University of London. Þaðan lauk ég doktorsnámi á sínum tíma og þykir vænt um þessa skemmtilegu nafnbót.
Doktorsritgerð Guðna fjallaði um fiskveiðideilur á Norður-Atlantshafi 1948-1964. Við útskrift nemenda, þar sem hann var sæmdur heiðursdoktorsnafnbótinni, flutti hann stutt ávarp og minnti þar á mikilvægi menntunar og sérfræðiþekkingar en ætíð yrði þó að hafa í huga takmörk þekkingar og nauðsyn þess að hlusta á ólík sjónarmið og nálganir á viðfangsefni.