Hljómsveitin Hugar gefur í dag út sína aðra plötu. Platan ber nafnið Varða og inniheldur 14 lög. Hljómsveitin gerði nýverið stóran plötusamning við Sony í Bandaríkjunum og er þetta fyrsta platan sem kemur út úr því samstarfi.
Fyrsta plata hljómsveitarinnar hefur hlotið gífurlegar vinsældir og hefur meðal annars verið streymt nærri 50 milljón sinnum á Spotify. Samhliða tónlistarútgáfu hefur hljómsveitin ferðast um heiminn og spilað tónleika og kemur til með að fylgja nýju plötunni eftir með miklu tónleikaferðalagi um Evrópu, Bandaríkin og Asíu.
Nýja platan, Varða, er nú aðgengileg á öllum helstu streymisveitum sem og á CD og vínyl.