Aukatónleikar verða með Justin Bieber 8. september – degi á undan áður auglýstum tónleikum. Miðasala hefst 8. janúar. Þetta kemur fram á vef RÚV.
Tónleikahaldarinn Ísleifur B. Þórhallsson segir í samtali við RÚV að samningar hafi klárast í nótt. „Og við fengum leyfi til að tilkynna þetta strax,“ segir hann.
Það er uppselt á tónleikaferðina um allan heim. Þeir eru spenntir fyrir því að koma til Íslands og það var vilji af þeirra hálfu til að leysa málið.
Miðar á tónleikana 9. september seldust upp á skömmum tíma. 19 þúsund miðar eru í boði á hvora tónleika.
„Þegar við sáum hvað gerðist í almennu sölunni á fyrri tónleikana og hversu margir þurftu frá að hverfa var þetta strax sett af stað,“ segir Ísleifur á vef RÚV.
„Við töldum að einir tónleikar væru alveg nóg en nú bendir allt til þess að það verði tvennir tónleikar með 38 þúsund tónleikagestum.“