Rúmlega fertugur bandarískur karlmaður, Jay Paul Robinson, sem er grunaður um nauðganir og að taka myndir af fólki á almenningssalerni er talinn hafa flúið til Íslands. Það er Rúv.is sem greinir frá þessu.
Robinson, var handtekinn í ágúst en myndefni á tölvu hans sýndi nauðganir og ýmis kynferðisbrot. Í dómsskjölum segir að efnið sýni Robinson ítrekað byrla konu ólyfjan og nauðga henni.
Nokkrum dögum eftir að dómstóll hafði gefið út heimild til að leita í tölvugögnum hans var hann flúinn úr landi. Ekki er vitað hvar Jay heldur sig núna en hann bókaði flug til Keflavíkur þann 5. ágúst.