„Þetta er alls engin töfralausn heldur bara ein hlið á þessum erfiða tening sem fíkniefnaneysla er,“ segir Jón Þór Ágústsson, eigandi verslunarinnar King Kong, en hann hefur í samstarfi við Varlega.is hafið sölu á fíkniefnaprófum.
„Engar innihaldslýsingar eru á umbúðum ólöglegra vímuefna og ekkert gæðaeftirlit. Fólki er þá gjarnan gert að leggja traust sitt í hendur ókunnugra aðila, sem selja efnin á svörtum markaði, og þekkja sjálfir jafnvel ekki styrkleika efnanna eða hvaða íblöndunarefni kunna að vera í þeim.“
Þessi fíkniefnapróf eru ekki þessi hefðbundnu fíkniefnapróf sem skoða hvort neysla fíkniefna hafi átt sér stað heldur eru þessi próf notuð til þess að kanna styrkleika hinna ýmsu fíkniefna.
Fentanyl-strimlar fyrir Frú Ragnheiði
„Hingað til hafa þessi próf einungis verið til sölu í gegnum vefsíðuna Varlega.is en ég ákvað að hefja samstarf við þá því þetta er gott og gilt verkfæri í baráttunni gegn ofneyslu á vímuefnum. Þeir eiga líka í frábæru samstarfi við Frú Ragnheiði og ég verð eiginlega að taka það fram að hægt er að styrkja þau góðu samtök með því að kaupa Fentanyl-strimla í gegnum vefsíðuna þeirra,“ segir Jón Þór og bætir við að viðtökurnar hafi verið góðar.
„Já, ég hef strax selt þó nokkuð af þessum prófum. Það er aldrei að vita hvað er í þessum efnum í dag og því getur það bókstaflega bjargað mannslífi að nota þessi próf þegar þau eiga við – það er til dæmis ekkert grín að fá fentanyl-blönduð fíkniefni eða lyf.“
Heimapressuð fíkniefni í umferð
Eitthvað hefur borið á því að búið sé að blanda fentanyl ásamt öðrum efnum í heimapressuð lyf sem svo eru seld sem annaðhvort kvíðastillandi töflur í líkingu við Xanax eða jafnvel heimapressaðar OxyContin-töflur. Með prófunum sem fást hjá Varlega.is og King Kong er hægt að kanna hvort töflurnar eða duftið inniheldur fentanyl.
Á vefsíðu Varlega.is kemur fram að fyrirtækið sérhæfi sig í innflutningi og sölu á vímuefnaprófum til einkanota. Þar segir enn fremur að prófin séu ekki ætluð til að skima fyrir um hvort einstaklingur hafi neytt vímuefna heldur eru þau ætluð til að prófa sjálf efnin.
„Vegna gildandi löggjafar á Íslandi eru flest vímuefni ólögleg hér á landi. Það getur haft í för með sér ýmsar óæskilegar afleiðingar, m.a. leiðir það til þess að sala og dreifing þessara efna er í höndum manna sem kjósa að höndla með ólögleg efni og hafa ekki nauðsynlega hagsmuni „viðskiptavinarins“ að leiðarljósi við sölu og markaðssetningu efnanna. Engar innihaldslýsingar eru á umbúðum ólöglegra vímuefna og ekkert gæðaeftirlit. Fólki er þá gjarnan gert að leggja traust sitt í hendur ókunnugra aðila, sem selja efnin á svörtum markaði, og þekkja sjálfir jafnvel ekki styrkleika efnanna eða hvaða íblöndunarefni kunna að vera í þeim. Það er vel þekkt að á svörtum markaði er algengt að íblöndunarefnum sé, í ýmsum tilgangi, blandað við þá vímugjafa sem um ræðir hverju sinni. Í sumum tilfellum kunna einhver íblöndunarefni að hafa óæskilegar aukaverkanir og geta jafnvel verið skaðleg heilsu neytanda,“ segir á Varlega.is þar sem hægt er að sjá úrval þeirra prófa sem núna eru í boði til sölu á Íslandi.