Skipulagðir glæpahópar hlakka til páska: „Farðu yfir þennan gátlista áður en þú ferð að heiman“
Reykjavík er ekki lengur lítil saklaus borg. Reyndar hefur öryggi borgara á landinu öllu ekki verið eins og við ættum að venjast. Skotárásir, skipulögð innbrot í heimahús og þaulskipulagt rán á peningaflutningabíl er bara toppurinn á ísjakanum.
Fræðslumyndband frá Ríkislögreglustjóra.
Af þeim sökum er vert að minnast á það að það styttist óðum í páskafríið okkar Íslendinga. Þessa frídaga er vinsælt að nota í skíðaferðir, ferðir út á land, helgarferðir til Evrópu eða jafnvel D-vítamín ferð til Tenerife. En miðað við ástandið í þjóðfélaginu í dag er mikilvægt að ganga frá heimili sínu á þann hátt sem fælir eða kemur í veg fyrir að eignin detti inn á radar þeirra fingralöngu sem vinna í myrkrinu.
Ríkislögreglustjóri hefur gefið út ákveðnar tilmælingar til íbúa og telur upp nokkra hluti sem gott er að hafa í huga til þess að varna innbrotum:
✔️Læsa hurðum.
✔️Loka gluggum.
✔️Vera með góða lýsingu,- á tímastilli, ef hægt er.
✔️Láta nágranna vita um fríið og hvenær er ætlunin að koma aftur.
✔️Ekki auglýsa fjarveru þína á samskiptamiðlum.
Leiðbeiningar frá Neytendastofu þegar það kemur að tryggingum heimilisins:
Ef þú ert einstaklingur án fjölskyldu dugar góð heimilistryggingu langt. Ef þú átt íbúð þarftu líka að íhuga að kaupa fasteigna-/húseigendatryggingu fyrir vatnstjón, óveðurstjón og innbrotstjón á t.d. hurðum, gólfefnum, innréttingum og fleiru sem tilheyrir fasteigninni.
Algengt er að heimilistrygging innihaldi:
– innbústryggingu sem bættir tjón vegna bruna, skammhlaups, umferðaróhapps, innbrotsþjófnaðar, þjófnaðar, ráns, skemmdarverka, útstreymis vökva, óveðurs, ofhitunar á þvotti, brots eða hruns, skýfalls eða asahláku, skemmda á kæli- og frystivörum.
– innbúskaskó sem bætir tjón á lausafjármunum úr innbúi vegna skyndilegra ófyrirsjáanlegra utanaðkomandi orsaka.
– ábyrgðartryggingu sem bætir tjón sem vátryggður veldur öðrum og ber ábyrgð á samkvæmt íslenskum lögum.
– slysatryggingu í frítíma sem greiðir bætur vegna dauðsfalls, varanlegrar og læknisfræðilegrar örorku, tímabundins missis starfsorku, sjúkrakostnaðar og tannbrots. Vátryggingin gildir oftast hvar sem er í heiminum í frítíma, við heimilisstörf og við nám.
– greiðslukortatryggingu sem bætir tjón ef greiðslukort hins vátryggða tapast og óviðkomandi aðili misnotar það með sviksamlegum hætti.
– réttaraðstoðartryggingu sem greiðir málskostnað vegna ágreinings í einkamálum.
– ferðatryggingu sem inniheldur farangurstryggingu, ferðasjúkratryggingu, ferðarofstryggingu, samfylgd í neyð, endurgreiðslu ferðar, farangurstöf og stundum, en ekki alltaf, forfallatryggingu.
Fyrir þá sem vilja einfaldari og takmarkaðri vernd er hægt að kaupa heimilistryggingu samsetta úr færri vátryggingarþáttum, t.d. innbústryggingu og ábyrgðartryggingu.