H&M opnar í Smáralind á laugardaginn og heldur umtalað opnunarpartí á fimmtudag. Gestalistinn er risavaxinn og gestum er lofað frábærum mat, drykkjum, tónlistaratriðum og að sjálfsögðu 20 prósent afslætti af fötum.
Í skilaboðum til boðsgesta sem send voru út í dag kemur fram að gestir fá sérsakt armband við komuna í partíið og að rútur ferji fólk úr miðborginni og í verslunina í Smáralind reglulega allt kvöldið.
Gestalistinn er stútfullur af þekktum andlitum. Á meðal þeirra eru Arnór Dan, söngvari Agent Fresco, leikkonan Elma Stefanía og leikararnir Gísli Örn Garðarsson, Hilmir Snær og Gói. Saga Garðarsdóttir er einnig á gestalistanum rétt eins og Simmi og Jói, Dísa í World Class, Andrea Róberts og ljósmyndarinn Ari Magg.
Fyrirsætan Andrea Röfn er einnig á gestalistanum, Berglind Festival og Rúvararnir Atli Már, María Sigrún og Rakel Þorbergsdóttir eru þar líka rétt eins og Eva Laufey Kjaran, Bjarki Gunnlaugsson, Hildur Yeomen, Jóhannes Haukur, Björn Bragi, ýmsir úr heimi viðskipta, lífsstílsbloggarar, Snapparar, ferðaþjónustuaðilar og miklu fleiri.