Meiri erill var hjá lögreglu á útihátíðum landsins í nótt heldur en fyrrinótt. Talsverður erill var hjá lögreglunni í Vestmannaeyjum þar sem fimm gistu fangageymslur vegna ölvunnar. Einnig var erilsamt hjá lögreglunni á Akureyri og talsverð ölvun var í bænum að því er kemur fram í frétt RÚV.
Talsverð ölvun var í Herjólfsdal í Vestmannaeyjum í nótt en þó engin stórvægileg vandræði. Fimm gistu fangageymslur vegna ölvunnar og leiðinda en 13 fíkniefnamál komu upp.
Á Akureyri var einnig talsverð ölvun, hávaði og smá pústrar. Þrír gistu fangageymslur, þar af tveir vegna líkamsárásar.
Allt fór fram með ró og spekt á Mýrarboltanum á Bolungarvík samkvæmt lögreglunni á Ísafirði.