Vefverslun Nespresso hefur verið opnuð en til stendur svo að opna fyrstu verslun Nespresso í Kringlunni í desember. Hylkin kosta frá 60 upp í 72 krónur stykkið sem er aðeins ódýrara en fólk hefur greitt fyrir hylkin í Bandaríkjunum.
Nespresso-kaffivélar hafa verið seldar hér á landi um árabil en fólk hefur hingað til þurft að nálgast kaffihylkin með krókaleiðum. Fólk hefur ýmist keypt þau erlendis eða í gegnum aðila sem hafa selt þau hér á landi án þess að vera með sérstakt umboð fyrir þeim.
Jónas Hagan, forsvarsmaður verslunarinnar, sagði í samtali við Morgunblaðið í sumar að verðið á Nespresso-hylkjunum verði að öllum líkindum lægra hér á landi en í Bandaríkjunum. „En þetta verður sennilega aðeins dýrara en á meginlandi Evrópu,“ sagði hann þá.