Gamalt myndband sem sýnir hvernig það er að vera inni í húsi sem verður fyrir hvirfilbyl hefur vakið mikla athygli á Reddit í dag. Myndbandið var tekið upp 17. nóvember 2013 og þó það sé meira en fimm ára gamalt er það einfaldlega svo magnað að það er vel þess virði að sjá.
Í myndbandinu má sjá manninn, Marc Wells, fylgjast með óveðrinu aðvífandi áður en hann leitar skjóls á heimili sínu með dóttur sinni. Á augnabliki gengur hvirfilbylurinn svo yfir húsið og leggur það og nærliggjandi hús algjörlega í rúst. Sem betur fer meiðist hvorki maðurinn né dóttir hans og í lok myndbandsins ákveða þau að koma sér út til að forða sér frá húsinu ef það skyldi hrynja og reyna að hjálpa nágrönnum sínum. Á sama tíma má heyra neyðarsírenur almannavarna berast um allt.
Óveðrið kostaði átta manns lífið og næstum 200 slösuðust, en þetta var fjórði stærsti hvirfilbylur sem hefur gengið yfir fylkið.