Til árekstra hefur komið á milli múslimskra barna og samnemenda vegna föstumánaðarins, ramadan, sem nú stendur yfir. Ramadan stendur yfir til 19. mars. Á föstumánuðinum er ætlast til að múslimar borði hvorki né drekki frá sólarupprás til sólarlags.
Í þýska bænum Kleve, nálægt Dusseldorf, urðu árekstrar milli barna af múslimskum uppruna og annarra vegna föstunnar. Múslimabörnin mæta svöng í skólann og gera kröfu um að önnur börn sýni þeim tillitssemi og borði ekki skólamat á ramadan. Bar við að kröfunni fylgdu hótanir ef ekki væri tekið tilliti til trúarsiðarins að neyta ekki fæðu yfir daginn. Aldurshópurinn sem um ræðir er 10 til 12 ára.
Foreldrum þyki of langt gengið
Foreldrar barna, sem ekki aðhyllast múslímatrú, kvörtuðu til skólayfirvalda að gamall og góður þýskur siður, að taka með sér nesti að heiman og borða á matmálstíma, væri ekki virtur vegna yfirgangs nemenda með framandi trúarsannfæringu. Víðlesnir þýskir fjölmiðlar, t.d. Die Welt og Bild fjalla um málið.
Foreldri stúlku sem ekki fékk næði til að borða skólanestið segist hafa skilning á ólíkri trúarsannfæringu nemenda en þetta væri of langt gengið. Skólayfirvöld hafa lofað að skoða málið ofan í kjölinn og finna lausn sem sátt gæti orðið um.
Fastan á ramadan er eitt af fimm kjarnaatriðum í íslam, kallaðar súlur. Hinar fjórar súlurnar eru trúarjátningin (enginn er guð nema Allah og Múhameð er spámaður hans), bænin (fimm sinnum á dag), pílagrímsferðin (einu sinni á ævinni) og ölmusan (gefa mosku eða fátækum hluta launa sinna).