Hinn umdeildi stjórnmálaskýrandi, metsöluhöfundur og ritstjóri, Ben Shapiro er yfir nóttu orðinn einn vinsælasti tónlistarmaður vestanhafs með útgáfu lagsins „Facts“ ásamt kanadíska rapparanum Tom Macdonald. Athugið að þetta er ekkert grín – lagið sem er ádeila á allt það sem gerst hefur í Bandaríkjunum á undanförnum árum og mánuðum er nú það vinsælasta á YouTube, iTunes og Spotify. Lagið er vinsælla en nýjustu lög Justin Timberlake og Nicki Minaj og má segja að „internetið“ sé á hliðinni út af öllu þessu fjaðrafoki í kring um lagið.
En hver er Ben Shapiro?
Ben Shapiro er hægrisinnaður stjórnmálaskýrandi í Bandaríkjunum sem stofnaði „The Daily Wire“ og stjórnar nú einnig „The Ben Shapiro Show“ sem er vinsælasta hægri-hlaðvarp Bandaríkjanna.
Þá er hann einnig metsöluhöfundur, útskrifaðist frá Harvard Law School og er rétttrúnaðar gyðingur. Fjallað hefur verið um verk hans í næstum öllum helstu bandarískum dagblöðum og tímaritum og þá hefur hann komið fram í hundruðum útvarps- og sjónvarpsþátta. Hann hefur komið fram sem fyrirlesari á mörgum íhaldssömum viðburðum á háskólasvæðum um land allt. Hann er Repúblikani í húð og hár og styður Donald Trump.
En skoðanir kappans hafa reglulega valdið fjaðrafoki og þá sérstaklega varðandi fóstureyðingar, fjármögnun lögreglunnar í Bandaríkjunum og persónufornöfnum. Í þessu lagi fara þeir félagar Shapiro og Macdonald engum silfurhönskum um þessi málefni en þrátt fyrir það er lagið „Facts“ það allra vinsælasta vestanhafs.
Sjón er sögu ríkari…