Þrír menn sem grunaðir eru um hópnauðgun gegn konu á þrítugsaldri á hóteli á Akureyri hafa verið látnir lausir úr haldi lögreglu. Rannsókn málsins heldur þó áfram hjá lögreglunni á Norðurlandi eystra.
DV greindi fyrst frá málinu á sunnudag.
Ekki krafist gæsluvarðhalds
Samkvæmt heimildum DV var ekki farið fram á gæsluvarðhald yfir mönnunum og hafa þeir því verið látnir lausir á meðan rannsókn stendur yfir. Samkvæmt nýjum heimildum miðilsins voru þeir látnir lausir úr haldi í gærkvöld.
Lögreglan hefur ekki veitt frekari upplýsingar um málið að svo stöddu, annað en að nauðgunarmál sé til rannsóknar hjá embættinu.
Brotaþoli hlaut mikla áverka
Samkvæmt heimildum DV á brotaþoli að hafa hlotið mikla áverka eftir árásina. Það staðfesta heimildir Nútímans, sem segja að líkami hennar sé „næstum einn marblettur frá lærum upp að öxlum.“
Hún er sögð hafa þurft að þola margra klukkustunda ofbeldi af hendi hinna grunuðu.
Þá er einnig talið að mennirnir hafi tekið upp myndband af ofbeldinu og að það hafi farið í einhverja dreifingu á samfélagsmiðlum.
Áhrifavaldur nefndur í tengslum við málið
Það hefur meðal annars komið fram að einn hinna handteknu sé áhrifavaldurinn Kristján Einar Sigurbjörnsson, sem gengur undir nafninu Kleini á samfélagsmiðlum. Fjallað hefur verið um það með vísan í færslu fyrrverandi unnustu hans á Facebook.
Málið er áfram til rannsóknar hjá lögreglu. Engar frekari upplýsingar hafa verið gefnar út á þessu stigi.