Frakkinn Ben Lecomte ætlar að synda yfir Kyrrahafið fyrstur manna. Tilgangurinn er að vekja athygli á loftslagsbreytingum og hlýnun jarðar.
Með honum í för verður áhöfn vísindamanna sem ætla meðal annars að rannsaka plastmengun, áhrif kjarnorkuslyssins í Fukushima á sjávarlífið og súrnun sjávar.
Lecomte hóf sundið í gær frá Japan og ætlar að synda til San Fransisco. Hann mun að synda í átta tíma á dag en leiðin er níu þúsund kílómetrar. Áætlað er að hann verði meira en hálft ár að klára sundleiðina en ferðin er búin að vera í undirbúningi í sex ár.
Ben Lecomte kicks off his epic quest to swim 9,000 km from Tokyo to San Francisco, through shark-infested waters choked with plastic waste https://t.co/sZD4JiDqNZ pic.twitter.com/aesgp7LeEc
— AFP news agency (@AFP) June 5, 2018
Leiðin er alls ekki hættulaus en hann getur átt von á því að mæta hákörlum, verða stunginn af risamarglyttum, lenda í stormum og mikilli ölduhæð.
Þetta er þó ekki í fyrsta skipti sem hann syndir yfir úthaf en hann var einnig fyrsti maðurinn til að synda yfir Atlantshafið árið 1998.
Þá synti hann 6400 kílómetra á 73 dögum. „Aldrei aftur“ var það fyrsta sem hann sagði þegar hann kom í land en honum hefur greinilega snúist hugur.