Rúmlega 1.100 manns hafa skráð sig í hóp á Facebook sem berst fyrir því að fá vöruhús Costco til Akureyrar. Norðlensku vefmiðillinn Kaffið greinir frá því að hópurinn hafi verið settur á fót í gær en hann stækkar hratt.
Sjá einnig: Heimsókn í Costco: „Er bara búinn að segja bless við hinar búðirnar“ – sjáðu myndbandið
Mikill hugur er í fólkinu í hópnum. Einn leggur til að hópurinn fari að leita að lóð eða lausu húsnæði fyrir Costco. Annar bendir á að nóg sé af lóðum í Hörgársveit, rétt fyrir utan bæinn. Enn annar bendir á húsnæði sem hýsti áður verslunina Europris og annar bendir á Seiglureitinn svokallaða.
„Fílinn norður!“ segir ein og vísar í risafílinn sem er til sölu í Costco á tæplega 500 þúsund krónur og hefur vakið mikla athygli.
Costco opnaði í Kauptúni í Garðabæ á dögunum og hefur notið gríðarlegra vinsælda. Hávær orðrómur er um að aðstandendur verslunarinnar séu þegar byrjaðir að skoða að opna annars staðar á höfuðborgarsvæðinu. Ekkert hefur þó heyrst um áform að opna vöruhús á landsbyggðinni.