Ólafur Ragnar Grímsson forseti Íslands segir óskiljanlegt að allir á Íslandi geti ekki haldið mannsæmandi jólahátíð og þurfi að reiða sig á matargjafir. Þetta kom fram í kvöldfréttunum á RÚV. Bjarni Ben skýtur á Ólaf Ragnar á Twitter.
Ólafur Ragnar sagði í kvöldfréttunum á RÚV að aldraðir og öryrkjar eigi ekki að þurfa að bíða í röð úti í kuldanum eftir aðstoð en forsetahjónin aðstoðuðu við matardreifingu í dag.
Að þurfa að standa hérna í biðröð í kuldanum til þess að fá skyr og mjólk og brauð og kjöt og smá gjafir handa börnunum sínum. Það er mér gjörsamlega óskiljanlegt að þessari þjóð takist ekki að leysa þetta vandamál.
Ólafur sagði óskiljanlegt að í svona litlu landi með svona öflugar og margþættar stofnanir og alla þessa umræðu um velferðina og samhjálpina skuli okkur ekki takast að skipuleggja okkur á þann hátt að það geti allir gengið að því vísu að þeir geti haldið hátíðir af þessu tagi á mannsæmandi hátt.
Bjarni Benediktsson notaði Twitter til að skjóta á forsetann í kjölfarið.
Sýnist ÓRG vilja nýja forgangsröðun. Hvað með að hætta að úthluta forsetanum milljónum fyrir stórveislur þar sem vesluborðin svigna?
— Bjarni Benediktsson (@Bjarni_Ben) December 22, 2015
Bjarni var augljóslega í stuði í kvöld því þegar tístari sagði í kaldhæðni að „þetta fólk mætti ekki veslast upp“ svaraði Bjarni: „Ertu að meina að það þurfi frekar að veislast upp?“