Columbia-háskólinn í New York í Bandaríkjunum gerði vandræðaleg mistök í vikunni.
277 umsækjendur fengu jákvætt svar við umsókn sinni um meistaranám en klukkustund síðar fengu þeir önnur skilaboð og jafnframt neikvæðari skilaboð.
Fólkið sem fékk grænt ljós á inngöngu átti nefnilega allt að fá höfnun. Skólinn segir að um mannleg mistök hafi verið að ræða og harmar þau.
Þetta er ekki í fyrsta skipti sem bandarískur háskóli gerir mistök af þessu tagi.
Áttahundruð manns sem sóttu um inngöngu í Carnegie Mellon-háskólann í Pittsburgh fengu árið 2015 tölvupóst þess efnis að þeir hefðu fengið inngöngu í skólann. Í ljós kom að þeim hefði öllum verið hafnað og var þetta leiðrétt með öðrum tölvupósti nokkrum klukkustundum síðar.