today-is-a-good-day

Húsið í Keeping Up With the Kattarshians komið í Grjótaþorpið og mætir þörfum unglinganna

Áður en Svala og Bó fluttu inn í húsið í Keeping Up With the Kattarshians á föstudaginn var það tekið í gegn svo það myndi örugglega hæfa unglingum eins og þeim. Bragi Valgeirsson leikmyndahönnuður smíðaði húsið og hefur einnig séð um innréttingar og innanstokksmuni.

Ef litið er út um glugga hússins má sjá að það er farið að rökkva úti. Nú blasa ekki lengur við grænir akrar, heldur hús í Reykjavík.

Sjá einnig: Systkinin Bó og Svala kynnt til sögunnar í Keeping Up With the Kattarshians

„Þar sem við erum núna með tvo unglinga í húsinu ákváðum við að breyta innréttingunum og gera þetta að meiri unglingastað. Til þess að gera þetta enn skemmtilegra ákváðum við að hafa kvöldstemningu og glöggir aðdáendur átta sig kannski á því að kisuhúsið er komið í Grjótaþorpið í miðbæ Reykjavíkur,“ segir Bragi í samtali við Nútímann og vísar þar til þess að kettirnir geta horft „út“ um gluggana og séð myndir frá hverfinu.

Myndirnar og plakötin á veggjunum taka einnig mið af unglingunum en foreldrar þeirra fengu þó að velja eina mynd og vonast Bragi til þess að áhorfendur átti sig á um hvaða mynd er að ræða.

Í fyrstu tveimur þáttaröðunum bjuggu kettlingarnir á tveimur hæðum en þegar Svala og Bó fluttu inn var opnað upp á háaloft. Ekki þótti öruggt að hafa það opið þegar yngri kettlingarnir voru en þar sem systkinin eru orðin tæplega fimm mánaða var ákveðið að leyfa þeim að nýta háaloftið líka.

„Okkur langaði að sjá hvað stálpaðir kettlingar myndu gera á háaloftinu. Hvort þau myndu gera þetta að leiksvæði eða hvort þau myndu tjilla þarna og gerðum við þess vegna með opnum huga. Við sjáum núna að háaloftið er góður staður til að slappa af,“ segir Bragi.

Til að byrja var háaloftið tómt en núna er búið að setja nokkur leikföng þangað sem og hvíta gæru sem þeim finnst gott að kúra á. Unglingarnir gera þó auðvitað bara það sem þeim dettur í hug, eins og unglingum er von og vísa.

Þá voru hvítu kojurnar einnig fjarlægðar, enda eðlilegt að unglingar fái stærri og fullorðnislegri rúm. „Ég smíðaði handa þeim rúm og það væri frábært ef Svala og Bó myndu nota þau,“ segir Bragi en hingað til hafa þau viljað sofa á gólfinu.

Auglýsing

læk

Instagram