Læðan Ilmur er flutt inn ásamt kettlingunum sínum fimm þeim Halldóri Laxnes, Gæja, Snotru, Fanndísi Friðriks og Röggu Gísla í fallega húsið í Keeping Up With the Kattarshians. Fjölskyldan tekur við af svarta genginu Dimmu, Söru Björk, Svarthöfða og Úlfi Úlfi. Nýja fjölskyldan er mjög spennt fyrir flutningunum. Hér er hægt að fylgjast með kisunum í beinni útsendingu hér.
Móðirin Ilmur er tveggja ára. Hún fannst kettlingafull á vergangi, en gaut kettlingum sínum á yndislegu fósturheimili. Kettlingarnir eru fimm, þrjár læður og tvö fress.
Halldór Laxnes s
Halldór Laxness er fíngerður og bröndóttur högni. Hann lætur yfirleitt lítið fyrir sér fara enda feiminn og lítill í sér. Hann er rólegastur af systkinunum og yfirleitt sá sem róar bátinn þegar systkinin taka upp á því að þræta. Halldór Laxness er mjög skapandi eins og nafni sinn.
Gæi
Gæi er bröndóttur uppátækjasamur köttur. Hann er mikill prakkari en honum finnst sérstaklega skemmtilegt að stríða móður sinni. Gæi hefur mikið dálæti á Lóum og er fróður um þær. Það er alltaf líf og fjör í kringum Gæja sem líkar athyglin.
Ragga Gísla
Ragga Gísla er mikil kelirófa sem finnst ekkert betra en að liggja þétt upp við systkini sín. Hún er blíð og góð með skarpa hugsun. Ragga er kattþrifin og sér um tiltekt á efri hæðinni. Það fer lítið fyrir henni enda rólegust systkinna sinna.
Snotra
Snotra er mjög leikglöð og þar af leiðandi er aldrei lognmolla í kringum hana. Hún er uppátækjasöm hvít bröndótt læða og finnst ekkert skemmtilegra en að virkja allan systkinahópinn til leiks.
Fanndís Friðriks
Fanndís Friðriks er ein systkinana sem er svört á lit. Hún er mjög frökk, sanngjörn og sýnir mikið frumkvæði innan heimilisins sem hún stýrir með harðri hendi Fanndís er mikil keppnismanneskja sem lætur aldrei deigan síga.
Ilmur
Ilmur er mamma systkinanna fimm. Hún er virkilega ábyrgðarfull móðir, róleg og hlý í senn. Hún ákvað á unga aldri að eignast stóran hóp af börnum og er mjög stolt af þeim öllum. Ilmur er kelin og mannelsk læða.