Ilmur Kristjánsdóttir, Jón Gnarr, Katla Margrét Þorgeirsdóttir, Katrín Halldóra Sigurðardóttir, Sveppi og Arnór Pálmi Arnarson sjá um Áramótaskaupið í ár. Arnór Pálmi mun leikstýra skaupinu annað árið í röð. Þetta kemur fram í tilkynningu frá RÚV í dag.
Arnór segist hæstánægður með hópinn og að handritavinna gangi vel. Í hópnum séu bæði máttarstólpar í íslensku gríni og einstaklingar eins og Katrín Halldóra sem eru að stíga sín fyrstu skref og passi frábærlega í þennan hóp.
„Það er svo sem af nógu að taka í ár en allt tal um að Skaupið skrifi sig sjálft er ekki rétt. Þetta kostar hellings vinnu, marga kaffibolla, nokkur rifrildi og fullt af Lindu kaffisúkkulaði. Það er nefnilega hefð hjá okkur að kaupa eitt stykki af því eftir hádegismat og deila. Það er líka svo hentugt því það eru einmitt akkúrat sex molar í því,“ segir hann.
Tökur á skaupinu hefjast um miðjan nóvember og sér Glassriver um framleiðsluna líkt og í fyrra. Framleiðendur Skaupsins í ár eru Andri Ómarsson og Arnbjörg Hafliðadóttir ásamt Herði Rúnarssyni, Baldvini Z og Andra Óttarssyni.