Lögreglufélag Suðurnesja kallar eftir tafarlausum aðgerðum í húsnæðismálum embættisins en þann 16. október 2023 var lögreglustöð útkallsliðsins að Hringbraut lokað vegna rakaskemmda og myglu. Þetta kemur fram á vef Víkurfrétta en miðillinn hefur fjallað ítarlega um myglumál lögreglunnar.
Í frétt Víkurfrétta kemur fram að viðgerð á hluta húsnæðisins stendur enn yfir en af þeim sökum þarf útkallsliðið að deila húsnæði með rannsóknardeild, lögfræðisviði og yfirstjórn: „…sem væri undir eðlilegum kringumstæðum besta staðan ef það húsnæði væri ekki skrifstofurými sem er ætlað rúmlega 40 starfsmönnum en hýsir nú tæplega 70 manns á dagvinnutíma.“
Þröngt á þingi
Það má því segja að það sé þröngt á lögregluþinginu suður með sjó en í tilkynningu lögreglufélagsins kemur fram að starfsmenn embættisins þurfi að finna það hjá stjórnvöldum að starfið sem þeir sinna af mikilli elju og hugsjón sé metið að verðleikum.
Lögreglufélag Suðurnesja skorar á Framkvæmdasýsluna – Ríkiseignir að bregðast við hið fyrsta.
Víkurfréttir fjölluðu um málið fyrir nokkrum mánuðum nokkuð ítarlega en hægt er að lesa þá umfjöllun með því að smella hér.