Áheitasöfnun fyrir Reykjavíkurmaraþon Íslandsbanka lauk í gær og rúmlega 155 milljónir króna söfnuðust til góðgerðarfélaga. Leikarinn Ólafur Darri Ólafsson safnaði mest af einstaklingum sem kepptu í ár og hópurinn Hlaupum fyrir Ágúst safnaði mestu af hópum sem tóku þátt í ár, en hægt er að sjá alla þá sem hlupu í þágu góðs málefnis og söfnuðu fjárstyrkjum á hlaupastyrkur.is.
Reykjavíkurmaraþonið er haldið af Íþróttabandalagi Reykjavíkur í samstarfi við Íslandsbanka og í ár var hlaupið í 35. sinn. Þátttakendur í hlaupinu í ár voru um 14 þúsund og um fimm þúsund þeirra hlupu í þágu góðs málefnis og söfnuðu fjárstyrkjum.
Sjá einnig: 155 milljónir króna söfnuðust í Reykjavíkurmaraþoni Íslandsbanka
Það var leikarinn góðkunni Ólafur Darri Ólafsson sem safnaði mest af þeim einstaklingum sem tóku þátt í hlaupinu, eða rúmlega 1,2 milljón króna, fyrir AHC samtökin. Vigdís Þórarinsdóttir safnaði rúmlega 1,1 milljón króna fyrir Arnar Jan og Thomas Orri styrktarfélag og þar á eftir var það Hilmir Vilberg Arnarsson sem safnaði sléttri einni milljón fyrir CMT4A Styrktarsjóður Þórdísar.
Fjölmargir hlaupahópar hlupu í þágu góðra málefna í ár en mestu safnaði hópurinn Hlaupum fyrir Ágúst eða rúmlega 8,3 milljónum króna fyrir MND félagið á Íslandi. Bleika Hjörðin safnaði næstmestu eða rúmlega þremur milljónum króna fyrir Minningarsjóð Einars Darra og hópurinn Hlaupið í minningu Mikaels Rúnars safnaði tæplega 2,5 milljónum króna fyrir Birtu – Landssamtök.
Töluverð aukning var á söfnun hlaupastyrkja frá síðasta ári þegar 118 milljónir söfnuðust en hlaupastyrkurinn rennur óskertur til góðgerðarfélaganna sem voru 180 talsins í ár.