Rekstrarfélagi Stjórnarráðsins barst beiðni frá Sigmundi Davíð Gunnlaugssyni, fyrrverandi forsætisráðherra, 1. apríl á þessu ári um að skoða tölvu hans vegna rökstudds gruns hans um mögulegt innbrot. Við ítarlega leit starfsmanna Rekstrarfélagsins fundust ekki staðfest ummerki um að innbrot hefði átt sér stað.
Þetta kemur fram í skriflegu svari frá Rekstrarfélagi Stjórnarráðsins til Nútímans. Aðstoðarmaður Sigmundar Davíðs segir að „græjum til upplýsingaöflunar“ hafi verið komið fyrir í tölvu Sigmundar og að þær hafi fundist við skoðun árið 2015.
Sigmundur Davíð sagði í ræðu sinni á miðstjórnarfundi Framsóknarflokksins sem fór fram um helgina að brotist hafi verið inn í tölvu hans. Fór hann yfir það hvernig fylgst var með honum og hann eltur vegna málsins, enda hagsmunirnir gríðarlegir. „Ég gerði alltaf ráð fyrir að það væri fylgst með því sem ég segði í símann,“ sagði hann.
Ég veit að það var brotist inní tölvuna hjá mér, ég lét skoða það.
Nútíminn kannaði málið í dag. Sigurður Már Jónsson, upplýsingafulltrúi ríkisstjórnarinnar, hafði ekki upplýsingar um meint innbrot í tölvu Sigmundar Davíðs. Hann segist ekki geta tjáð sig um öryggismál, það sé í höndum Rekstrarfélags Stjórnarráðsins og eftir atvikum ríkislögreglustjóra.
Þegar Nútíminn hafði samband við Stefán Snorra Stefánsson, sérfræðing í netöryggismálum hjá Póst- og fjarskiptastofnun, sagðist hann engar upplýsingar hafa um meint innbrot aðrar en þær sem hann hafði séð í fjölmiðlum. Hann segir að mál sem þessi hafi komið inn á borð stofnunarinnar. Varði málið öryggi ríkisins fari það til embætti Ríkislögreglustjóra og eftir atvikum til stofnunarinnar.
Embætti ríkislögreglustjóra hefur ekki verið tilkynnt um innbrot í tölvu fyrrverandi forsætisráðherra. Þetta kemur fram í skriflegu svari embættisins til Nútímans.
Jóhannes Þór Skúlason, aðstoðarmaður Sigmundar Davíðs, segir í samtali við Nútamnn að tæknimenn Rekstrarfélagsins hafi farið yfir tölvubúnað Sigmundar Davíðs í fyrra eftir að hann fór að gruna að brotist hefði verið inn í tölvu hans. Hann segir að tæknimenn hafi fundið „græjur til upplýsingaöflunar.“
Hann segir að málið hafi ekki verið kært til lögreglu heldur aðeins unnið innan Stjórnarráðsins þar sem það hafi sína eigin öryggisdeild sem embætti Ríkislögreglustjóra hafi umsjón með.
Að sögn Jóhannesar ráðlögðu tæknimenn Sigmundi að hætta að nota tölvuna sína. Jóhannes segir að tölvan sín hafi ekki verið könnuð þrátt fyrir að í ljós hefði komið að einhver hefði reynt að ná upplýsingum úr tölvu Sigmundar.
Aðspurður sagði Jóhannes að málið hafi komið upp árið 2015. Hann viti þó ekki nákvæmlega hvenær ársins það hafi verið þar sem hann hafi sjálfur ekki alveg inni í málinu á sínum tíma.
Jóhannes segir að miklir hagsmunir hafi verið undir vegna uppgjörs slitabúa föllnu bankanna. Mikil forvitni hafi ríkt í kröfuhafahópnum um hvernig ríkið myndi snúa sér í þeim málum. „Menn áttuðu sig á því að það var um mikla hagsmuni að ræða, að menn reyndu að nálgast upplýsingar með þessum hætti,“ segir hann.
Aðspurður segist Jóhannes ekki geta sagt til um hvort ríkisstjórnin hafi verið upplýst um innbrot í tölvu Sigmundar. Þá veit hann ekki hvort vitað sé hverjir komu hugbúnaðinum fyrir.