Eðla er ostadýfa sem samastendur af rjómaosti, salsasósu og osti. Hún er svo bökuð í ofni og borðuð með kornflögum. Nútíminn hefur rannsakað uppruna þess að rétturinn er kallaður Eðla og birti frétt á dögunum um að vinur grínistanna Steinda jr. og Dóra DNA frá Mosfellsbæ sé upphafsmaðurinn.
Bæjarblaðið Mosfellingur hefur kafað enn dýpra í málið og afhjúpar í dag söguna á bakvið Eðluna.
Sjá einnig: Eðlan eykur sölu á rjómaosti
Steindi jr. hefur haldið Eðlunafninu á lofti á samfélagsmiðlum og sendi reglulega Snapchat af sér að borða sjóðandi heita Eðlu. Þá hefur hann birt myndir af Eðlum á Instagram ásamt því að ræða um Eðlur við notendur á Twitter. Talið var að Steindi og félagar hafi byrjað að nota orðið fyrir um áratug síðan en í Mosfellingi kemur fram að ostadýfan heita hafi fengið nafnið Eðla árið 2001.
Vinkonurnar Vigdís Guðmundsdóttir, Eva Ósk Svendsen, Anna María Örnólfsdóttir og Telma Baldursdóttir hafa lengi verið saman í saumaklúbbi. Í viðtali við Mosfelling segja þær að ostadýfan hafi verið tíður réttur þegar þær hittast.
„Við höfðum oft að talað um það að okkur vantaði nafn á saumaklúbbinn, svo eitt kvöldið 2002 þegar við hittumst kom það. Þann dag hafði Telma farið örlagaríka ferð í Europris og keypt sér hillu,“ segir Eva Ósk í Mosfellingi og Telma tekur við:
Ég hafði sem sagt keypt mér hillu í Europris, fór heim og ætlaði að fara að setja hana saman. Þegar ég opnaði pakkninguna þá var dauð eðla í hillunni. Um kvöldið tók ég eðluna með í lokuðu boxi til að sýna stelpunum, og þar sem við höfðum verið að vandræðast með nafn á klúbbinn fannst okkur tilvalið að kalla okkur Eðlurnar.
Svo vildi til að Anna María var með ostadýfu í ofninum þetta örlagaríka kvöld og síðan þá hefur rétturinn aldrei verið kallaður annað en Eðlurétturinn eða Eðlan.
„Við höfum oft boðið upp á Eðlu í afmælum og veislum. Fólk í kringum okkur fór þá líka að kalla réttinn Eðlu og nafnið greinilega fest við og hann gengur nú undir þessu nafni um allt land,“ segir Telma.