Sigga Dögg kynfræðingur hefur varað fólk við því að smyrja smjöri á smokka þegar stundað er kynlíf. Sigga sendir frá sér áríðandi tilkynningu á Facebook í morgun í ljósi frétta dagsins.
Í gærkvöldi fjölluðu Stundin og DV um upptökur þar sem þingmenn Miðflokksins heyrast tala með niðrandi hætti um kvenkyns stjórnmálamenn í samtölum sín á milli.
Ein ummælin sem vöktu athygli voru ummæli Gunnars Braga þegar hann sagði að Geir H. Haarde, fyrrverandi forsætisráðherra, hefði sloppið í gegn „eins og smjör á smokknum hjá honum þarna Friðriki Ómari,“ í umfjöllun fjölmiðla þegar Geir var skipaður sendiherra Íslands í Washington.
Sigga Dögg bendir fólki á að ekki þurfi að smyrja smokkinn með smjöri og að það þurfi ekki að smyrja smokka með neinu. Hún segir að smjör auki líkurnar á því að smokkurinn rifni. Hún bætir því við að ekki eigi heldur að smyrja kynfærin eða rassinn með smjöri.
Í athugasemdum við færsluna bætir hún því við að hún hafi aldrei haldið tölu yfir fjölda bólfélaga enda segi það ekkert til um hvernig kynlíf hún fíli. Hún kunni samt alveg að telja og reikna í huganum.
Anna Kolbrún Árnadóttir segir í upptökunni að stelpur séu að meirihlutanum talnablindar og Gunnar Bragi spyr hvort það sé þess vegna sem þær viti ekki hjá hvað mörgum þær sofa hjá.