Rússneska Youtube-stjarnan Ruslan Sokolovsky á yfir höfði sér fimm ára fangelsisdóm eftir að hafa tekið upp myndband sem sýnir hann spila Pokémon Go í kirkju í heimalandi sínu. Þetta kemur fram á vef The Guardian.
Myndbandið sem um ræðir hefur nú verið skoðað tæplega milljón sinnum. Horfðu á myndbandið hér fyrir neðan.
Í yfirlýsingu frá lögregluyfirvöldum kemur fram að hinn 21 árs gamli Sokolovsky sé ákærður fyrir að vanvirða trú og kynda undir hatur. Hann var úrskurðaður í tveggja mánaða gæsluvarðhald og þarf að bíða þar til mál hans verður tekið fyrir hjá dómstólum landsins.
„Hvernig er hægt að móðga með því að fara inn í kirkju með snjallsíma? Ég veit að það er í lagi og ekki brot á lögum,“ er haft eftir Sokolovsky á vef The Guardian.
Málið hefur vakið mikla athygli í Rússlandi. Borgarstjóri heimaborgar Sokolovsky mótmælir ákvörðun lögregluyfirvalda harðlega og segir að ekki sé hægt að handtaka menn fyrir að haga sér heimskulega.
Á Twitter reynir fólk að koma Youtube-stjörnunni til hjálpar og nota kassamerkið #SaveSokolovky til að vekja athygli á málinu.
Umrætt myndband má sjá hér fyrir neðan
https://youtu.be/PfMn1yahGYk