Árni Björn Guðjónsson, listmálari og húsgagnasmiður, hefur dregið til baka framboð sitt til forseta Íslands. Árni Björn greindi frá framboðinu í gær en er nú hættur við vegna „sérstakra ástæðna.“ Þetta kemur fram í yfirlýsingu frá Árna.
Árni er 76 ára og bauð sig fram á Alþingi fyrir Kristilega lýðræðisflokkinn árin 1995 og 1999. Í yfirlýsingunni segist hann vona að hver sem nái kjöri verði ötull baráttumaður eða -kona gegn hatri meðal mannkyns.
Árni Björn tók þátt í frumkvöðlaþættinum Toppstöðinni á RÚV í haust. Þar kynnti hann gríðarlega metnaðarfulla hugmynd: Risavaxinn heilsugarð sem átti að vera undir glerþaki. Þegar hann kynnti hugmyndina í þættinum var hann þegar búinn að fá tilboð í glerþakið upp á fjóra milljarða.
Horfðu á kynningu Árna í spilaranum hér fyrir ofan.
Hugmynd Árna komst ekki áfram en hann sagðist þó ætla að halda áfram að vinna í henni. Í garðinum eiga að vera 144 lúxusíbúðir, aðstaða fyrir brimbrettaiðkun, verslunarmiðstöð ásamt aðstöðu fyrir ýmsa aðra afþreyingu. Þá á að vera suðrænn Edengarður.
„Ég reikna með að svona staður yrði heimsfrægur á örskammri stund,“ sagði Árni í Toppstöðinni. Hann var afar ósammála mati dómnefndar.