Lánið lék svo sannarlega við íslenskan spilara í Vikinglotto, sem vann í kvöld langhæsta vinning sem nokkru sinni hefur komið til Íslands. Þessi lukkunnar pamfíll var einn með 2. vinning en vegna kerfisbreytinga var hann margfalt hærri en venja er eða alls 1.270.806.970 krónur en hefur hingað til hlaupið á nokkrum tuga milljóna. Aldrei hefur stærri vinningur komið til landsins en eftir því sem næst verður komist er þessi risavinningur um fimm sinnum hærri en sá næststærsti hingað til en vinningsmiðinn var keyptur á lotto.is.
1.Vinningur gekk hinsvegar ekki út að þessu sinni. Þá voru tveir heppnir miðahafar sem skiptu með sér hinum al-íslenska 3. vinning og hljóta þeir rúma 1 milljón króna í vinning hvor. Miðarnir góðu voru keyptir í Olís í Álfheimum í Reykjavík og í Lottó-appinu.
Átta miðahafar voru með fjórar réttar tölur í réttri röð í Jóker og hlýtur hver þeirra 100 þúsund krónur í vinning. Miðarnir voru keyptir í Hagkaup Furuvöllum á Akureyri, Fjarðarkaupum í Hafnarfirði, Olís í Borgarnesi, N1 í Reykjanesbæ, einn miðinnn var keyptur í Lottó appinu, einn miðinn var keyptur á heimasíðunni lotto.is og tveir miðanna voru í áskrift.