Öllum takmörkunum innanlands, vegna Covid-19 faraldursins, verður aflétt á miðnætti í kvöld. Þetta kom fram á fundi ríkisstjórnarinnar nú fyrir stundu.
Svandís Svavarsdóttir, heilbrigðisráðherra, biður þó fólk um að fara varlega.
„Það er stór dagur, ég finn það bara að það er dálítill hjartsláttur hjá mér, í glímunni við Covid-19,“ sagði hún á fundinum.
Frá og með miðnætti mega eins margir koma saman og fólk vill, engin grímuskylda og skemmtistaðir mega vera opnir til hálf fimm.
Sóttvarnaráðstafanir og skimanir verða þó áfram í gildi á landamærunum.