Sýningar hefjast í næsta mánuði á sænsk-íslensku sjónvarpsþáttaröðinni Thin Ice. Þetta kemur fram á vef Mbl
Framleiðslukostnaður þáttaraðarinnar nemur yfir einum og hálfum milljarði króna sem gerir hana þá dýrustu sem framleidd hefur verið hér á landi. Þættirnir verða frumsýndir á TV4/Cmore í Svíþjóð í byrjun febrúar, en fara síðan í sýningu á RÚV 16. febrúar. Framleiðsla þáttanna er í höndum Sagafilm Nordic, Norðurlandaskrifstofu fyrirtækisins Sagafilm í Stokkhólmi, og Yellow Nordic en handritshöfundar eru Birkir Blær Ingólfsson, Jónas Margeir Ingólfsson og Jóhann Ævar Grímsson.
Í tilkynningu frá Sagafilm segir að sögusvið þáttanna sé á Grænlandi, þrátt fyrir að stærstur hluti þeirra hafi verið tekinn upp á Íslandi. Var meðal annars Stykkishólmi breytt í grænlenskt þorp frá janúar og fram í apríl á síðasta ári.
Meðal leikara er sænska leikkonan Lena Endre, sem lék einnig í myndinni Karlar sem hata konur, Alexander Karim, Bianca Kronlöf, Grænlendingurinn Angunnguaq Larsen og danska leikkonan Iben Dorner, en þau tvö síðastnefndu léku bæði í sjónvarpsþáttunum Borgen, sem sýndir voru á RÚV fyrir nokkrum árum við góðar undirtektir.
Hér fyrir neðan má sjá stiklu úr þáttunum.