Veðurstofa Íslands hefur gefið út rauða viðvörun vegna veðurs og tekur hún gildi klukkan 04:00 í nótt til klukkan 08:00 á morgun, mánudag. Viðvörunin gildir fyrir höfuðborgarsvæðið, Faxaflóa og Suðurland.
Í dag fer fram fundur Almannavarna, Veðurstofunnar og Vegagerðarinnar þar sem rætt verður hvort biðlað verði til skóla um að hafa lokað á morgun. Einnig hvort vinnustaðir fái starfsfólk sitt til að halda sig heima fyrir hádegi. Þetta kemur fram í frétt vísis
„Það er bara það mikil snjókoma með þessu að það má búast við að það verði ófært víða, sem tekur bara tíma að hreinsa. Við höfum séð það áður að það tefur mjög mikið fyrir svoleiðis ef það er mikið af bílum sem fara af stað, þannig að við bara hvetjum alla til að bíða heima í fyrramálið og sjá hvernig staðan verður. Fylgjast vel með fjölmiðlum,“ segir Víðir Reynisson, yfirlögregluþjónn hjá Almannavörnum í samtali við vísi
Farið verður í það að ryðja á höfuðborgarsvæðinu um leið og mesta veðrið hefur gengið niður og gengur það hraðar fyrir sig ef sem fæstir eru á götum borgarinnar.