Biggi Maus breiðir yfir Frikka Dór – Nýjasta lag af ‘Litla dauða/Stóra hvell’ kemur út á miðnætti

 Á miðnætti gefur Birgir Örn Steinarsson, sem starfar undir listamannanafninu Biggi Maus, út ábreiðu á lagi Friðriks Dórs ‘I don’t remember your name’. Lagið er nú kannski ekki á meðal þekktustu slagara Frikka en það kom upphaflega út á annarri breiðskífu hans Vélrænn árið 2012. Friðrik samdi lagið ásamt þeim Ólafi Arnalds og Janusi Rasmussen sem saman mynda raf-dúettinn Kiasmos.

          „Mér hefur alltaf fundist Friðrik Dór vera afbragðs laga- og textahöfundur,“ segir Biggi. „Ég var mjög hrifinn af þessari plötu hans þegar hún kom út og var hissa að hún hafi ekki fengið meiri athygli. Oft rata góðir hlutir ekki alla leið upp á yfirborðið.“

          Lagið er þriðji og síðasti stökullinn af breiðskífunni ‘Litli dauði/Stóri hvellur’ sem kemur út á streymisveitum og á vínyl þann 5. júní. Toggi Nolem (Skytturnar, Kött Grá Pjé og Leður) pródúzerar öll lögin.

          „Það er sumar og ég í stuði til að poppa. Mig langaði til þess að prófa taka lag eftir einhvern annan íslenskan tónlistarmann og mundi eftir þessu frábæra ‘týnda’ lagi. Datt í hug að það væri gaman að prófa að útsetja það eins og ef Duran Duran eða Blondie væru að spila undir. Toggi Nolem dreifði svo sínu galdra-dufti yfir og nú er bara að hækka í botn og dansa.“

          Platan er öll unnin á Akureyri þar sem Biggi býr nú og starfar sem listamaður og sálfræðingur. Þar af leiðandi verður Akureyringum boðið að heyra plötuna fyrstir í sérstöku for-hlustunarpartý á LYST þann 30. maí næstkomandi.

 https://lyst.is/vidburdir/for-hlustunarparty-biggi-maus-litli-daudi-stori-hvellur/

          Biggi Maus & Memm munu svo standa fyrir útgáfutónleikaröð fyrir plötuna víða um land í haust. Æfingar eru hafnar en undirleikssveitina Memm skipa vel valdir tónlistarmenn frá Akureyri. Þeir verða kynntir til sögunnar þegar nær dregur.

          Birgir fagnar rúmlega 30 ára farsælum ferli í tónlistarbransanum um þessar mundir en hann hefur m.a. náð gullplötu sölu ásamt hljómsveit sinni Maus og unnið íslensku tónlistarverðlaunin ásamt Maus fyrir textagerð og sem hljómsveit ársins. Birgir vann svo Eddu verðaunin árið 2014 fyrir handrit ársins (Vonarstræti) ásamt Baldvin Z. Fjórum árum síðar skrifaði hann handritið af Lof mér að falla í samstarfi við leikstjórann.

          Birgir gaf út sex breiðskífur ásamt Maus en hans fyrsta sólóskífa (Id) kom út árið 2006. Siðan þá hefur hann gefið út lög og plötur á streymisveitum með hljómsveitunum Króna (2008-2010) og Bigital (2015).

Auglýsing

læk

Instagram