Wanda Dench, amma í Arizona í Bandaríkjunum, varð skyndilega fræg þegar hún bauð óvart ókunnugum sautján ára dreng í árlega þakkargjörðarmáltíð fjölskyldunnar.
Jamal Hinton, sem fékk boðið, bað ömmuna um að senda mynd af sér þar sem hann kannaðist ekki við að amma hans væri með þetta númer.
Þegar í ljós kom að Dench hafði sent röngum unglingi skilaboð sagðist hún samt sem áður vilja bjóða honum í mat.
Og hún stóð svo sannarlega við það!
Bandaríkjamenn fögnuðu þakkargjörðarhátíðinni á fimmtudaginn og mætti Hinton í mat til Dench áður en hann naut máltíðar með fjölskyldu sinni.
„Við borðuðum og hann sagði mér frá því sem hann ætlar að gera í framtíðinni, og ég er bara svo spennt hans vegna,“ sagði amman í samtali við CNN.
„Ef þú getur gert eitthvað gott fyrir einhvern, gerðu það,“ sagði hún einnig.