Þjóðfélagsrýnirinn og sparkspekingurinn Illugi Jökulsson spáði rétt fyrir um allar þjóðirnar þrjár sem Ísland mætir í D-riðli á Heimsmeistaramótinu í fótbolta í Rússlandi í sumar.
Illugi birti færsluna sem þú getur séð hér fyrir neðan á Facebook klukkan hálf níu í morgun og virtist kokhraustur. „Þið getið hætt að bíða eftir þessum þarna drætti í Rússlandi. Ísland fær Argentínu, Króatíu og Nígeríu. Ég gæti líka sagt ykkur hvernig leikirnir enda, en það væri kannski ekki sanngjarnt,“ sagði hann og það reyndist hárrétt.
Ísland mætir Argentínu í fyrsta leik sínum á Heimsmeistaramótinu í fótbolta í Rússlandi í sumar. Ísland er í D-riðli og mætir einnig Króatíu og Nígeríu. Á Twitter fylgdist fólk með drættinum og Nútíminn tók saman viðbrögðin.
Leikurinn gegn Argentínu fer fram 16. júní í Moskvu. Ísland mætir svo Nígeríu í 22. júní í Volgograd og Króatíu 26. júní í Rostov.
Eftir dráttinn sagðist Illugi á Facebook hafa klikkað að leggja undir. Stór mistök. En hverjar verða lottótölurnar á morgun?
Þið getið hætt að bíða eftir þessum þarna drætti í Rússlandi. Ísland fær Argentínu, Króatíu og Nígeríu. Ég gæti líka sagt ykkur hvernig leikirnir enda, en það væri kannski ekki sanngjarnt.
Posted by Illugi Jökulsson on Föstudagur, 1. desember 2017