Um helgina fer fram hin árlega Arctic Circle ráðstefna í Hörpu. Heimsþekktir vísindamenn og stjórnmálamenn sækja ráðstefnuna sem og íslenskir stjórnmálamenn. Einn þeirra, Andrés Ingi Jónsson, þingmaður Vinstri grænna, gagnrýnir forsvarsmenn ráðstefnunnar fyrir að bjóða þátttakendum upp á vatn í plastflöskum.
Andrés tjáði sig um málið í færslu á Twitter. „Risastór ráðstefna #ArcticCircle2018 fjallar að miklu leyti um áskoranir í umhverfismálum á norðurslóðum. Þar vantar sko ekki verðandi plastúrganginn! Kommon,“ skrifar Andrés í færsluna sem vakið hefur töluverða athygli.
Risastór ráðstefna #ArcticCircle2018 fjallar að miklu leyti um áskoranir í umhverfismálum á norðurslóðum. Þar vantar sko ekki verðandi plastúrganginn! Kommon! pic.twitter.com/40IUrvPc7w
— Andrés Ingi (@andresingi) October 19, 2018
Andrés furðar sig á plastnotkuninni í samtali við Nútímann. „Það er kaldhæðnislegt að dreifa mörg hundruð einnota plastflöskum með vatni á ráðstefnu þar sem eitt aðalumræðuefnið er umhverfisvernd á norðurslóðum — þar sem við sjáum alltaf betur og betur hvað plastmengun er mikið vandamál,“ segir Andrés.
Hann segir auðvelt að koma í veg fyrir alla þessa plastnotkun á fundinum. „Það hlýtur að vera hægt að skipuleggja dagskránna þannig að fólk geti komist sæmilega reglulega í vatnskönnur og glös til að svala þorstanum. Sérstaklega í landi þar sem vantar ekki beinlínis hreint og gott kranavatn.“