Búið er að lóga selkópnum sem slapp úr Fjölskyldu- og húsdýragarðinum aðfaranótt mánudags og fannst á tjaldstæðinu í Laugardalnum. Þetta kemur fram á Vísi.
Í umfjöllun DV kemur fram að refirnir séu fóðraðir með selkjötinu.
Eftir því sem Nútíminn kemst næst ætti starfsfólk húsdýragarðsins að bjóða upp á selkjötið í veislu starfsmanna, sem haldin er á hverju hausti. Þá er starfsfólki boðið að gæða sér á dýrunum sem voru í garðinum um sumarið og kjöt dýranna á slikk.
Í skýrslu Matís um nýtingu selkjöts til manneldis kemur fram að selkjöt og aðrar afurðir sels hafi verið nýttar hér á landi frá örófi alda, eða þar sem selur hefur veiðst á annað borð.
Í skýrslunni kemur fram að selur sé mjög góður prótíngjafi auk þess sem kjötið inniheldur nauðsynlegar amínósýrur. Selkjöt er sérlega næringarríkt og framúrskarandi járn- og B vítamíngjafi.
Hér eru fimm fornar aðferðir sem hægt er að nota til að innbyrða kjötið.
1. Eftir að selkjöt hefur verið látið liggja um stund í sjó eða saltvatni, er það brytjað niður og saltað í tunnur. Svo er notaður pækill af saltkjöti og honum hellt yfir selkjötið.
2. Kjöt af haustkópum og fullorðnum sel var einkum valið til reykingar áður fyrr.
3. Nýtt soðið selkjöt var oft skorið í smábita og þeim síðan blandað saman við litla, soðna spikbita, sem lýsið hafði verið pressað úr.
4. Saltað selspik var einnig haft til matar, svo og brætt lýsi sem var notað út á fisk, borðað með soðnu selkjöti eða notað í ljósmeti.
5. Hjartað var einnig étið nýtt, stundum súrsað og oft saltað með kjötinu. Þindin var einnig étin ný og súrsuð.
