Maðurinn sem stakk konu í húsi Greiningar- og ráðgjafarstöðvar ríkisins við Digranesveg í Kópavogi á mánudag var með svokallaða „Scream-grímu“ fyrir andlitinu. RÚV greindi fyrst frá.
Hann skildi hníf og grímuna eftir í húsinu og vinnur lögregla að því að greina lífssýni á hlutunum. Árásarmaðurinn er ófundinn.
Lögreglunni hefur borist töluvert af vísbendingum vegna málsins sem unnið er eftir en enginn liggur undir grun. Líðan konunnar sem var stungin er góð eftir atvikum.
Á Greiningarstöðinni er börnum og unglingum með alvarlegar þroskaraskanir og fatlanir veitt greining, ráðgjöf og önnur úrræði. Lögregla telur málaflokkinn ekki tengjast árásinni.
Einn maður var handtekinn á mánudag vegna árásarinnar en sleppt að lokinni yfirheyrslu. Lögreglan telur hann ekki tengjast málinu.