„Þetta er alveg merkilegt. Ég skil ekki þetta þjóðfélag, Gunna. Ég skil ekki þetta þjóðfélag. Stundum líður mér eins og Ingva Hrafni þegar hann er að lesa yfir okkur í upphafinu á Hrafnaþingi og skilur ekkert í þessu.“
Svona hófst reiðilestur útvarpsmannsins Andra Freys Viðarssonar í Virkum morgnum á Rás 2 í morgun. Kveikjan var frétt Morgunblaðsins í morgun um að ríflega helmingur íbúða í nýjum 11 hæða turni við Lindargötu í Reykjavík séu þegar seldar. Íbúðirnar voru auglýstar til sölu laugardaginn 13. september.
Samkvæmt vefnum Skuggi.is eru 19 af 36 íbúðum í turninum seldar. Verð seldra íbúða er ekki gefið upp en áætla má að söluverðið sé um 1.200 milljónir króna, samkvæmt frétt Morgunblaðsins.
Andra Frey var heitt í hamsi þegar hann las upp úr fréttinni:
Af hverju er verið að setja nýja turna í Skuggahverfið? Eruði hálfvitar? Eru ekki tómir turnar þarna? Í alvörunni! Það er verið að byggja nýja turna og búið að selja 27 lúxusíbúðir. Eftir viku, var búið að selja íbúðir fyrir tæpa tvo milljarða.
Og hann hélt áfram: „Veistu það. Við eigum allt slæmt skilið hérna, hvað svona varðar — peningaflækjur og gjaldþrotarugl,“ sagði hann. „Við erum náttúrulega algjörir apar. Við vitum ekki af því. Á sjöunda áratugnum var alltaf verið að gera tilraunir með apa sem enduðu yfirleitt á að stúta sér, voru sendir út í geiminn og svona. Erum við þessir apar? Var okkur hent á þessa eyju og er verið að fylgjast með úr fjarska hvernig við rekum þjóðfélag? Hvað er þetta?“
Smelltu hér til að hlusta. Andri verður brjálaður á 24. mínútu.