Indriði Sigurðsson, fyrirliði Viking, þénaði jafnvirði rúmlega 40 milljóna íslenskra króna fyrir skatt á síðasta ári, samkvæmt nýútkomnu yfirliti yfir tekjur íbúa Noregs. Þetta kemur fram á Mbl.is.
Indriði var með mestar tekjur íslenskra fótboltamanna í Noregi með mánaðartekjur upp á 3,3 milljónir króna. Næstur kemur Birkir Már Sævarsson, leikmaður Brann, með rúmlega 24 milljónir í árslaun.
Steinþór Freyr Þorsteinsson, leikmaður Sandnes Ulf, var með rúmar 20 milljónir, Pálmi Rafn Pálmason leikmaður Lilleström með um 19 milljónir og Kristján Örn Sigurðsson, leikmaður Hönefoss, með rúmar 14 milljónir í árslaun.
Spútnikleikmaður landsliðsins, Jón Daði Böðvarsson leikmaður Viking, var með tæpar 11 milljónir í árslaun á síðasta ári og félagi hans frá Selfossi, Guðmundur Þórarinsson, leikmaður Sarpsborg, var með tæpar fimm milljónir.