Læðan Vanilla og börnin hennar fimm eru flutt inn í húsið í Keeping Up With the Kattarshians og munu búa þar á næstunni. Vanilla á fjóra syni og eina dóttur, þau Gretti, Nóa, Trítil, Tópas og Nóu. Þau komu í heiminn 14. mars og eru því fjögurra vikna í dag.
Hér er hægt að fylgjast með fjölskyldunni en einnig á Rás 0 í Sjónvarpi Símans.
Á næstunni gefst áhorfendum Keeping Up With the Kattarshians einstakt tækifæri til að fylgjast með agnarsmáum kettlingum stækka og þroskast.
Systkinin drekka enn af spena hjá mömmu sinni en Vanilla mun á næstu dögum og vikum kenna þeim að borða fasta fæðu og gera þarfir sínar í kassa. Við fáum því ekki aðeins að fylgjast með kettlingum stíga fyrstu skrefin í hinum stóra heimi, heldur fáum við innsýn inn í líf einstæðrar móður sem mun leiða börnin sín til sjálfstæðis.
Vanilla kom kettlingafull í Kattholt og gaut kettlingunum fimm fljótlega eftir komuna þangað. Sagt er að gulir kettlingar séu með einstaklega gott geðslag og það á svo sannarlega við um hana Vanillu. Hún er ósköp blíð og góð og sinnir móðurhlutverkinu af mikilli yfirvegun.
Fljótlega eftir að Grettir, Nói, Trítill, Tópas og Nóa komu í heiminn fóru þau ásamt Vanillu til fósturmömmu sem passaði upp á þau næstu fjórar vikur. Það er nauðsynlegt fyrir læður og kettlinga að fá að vera í rólegheitum fyrstu vikurnar.
Fósturmamman fékk mikilvægt hlutverk, hún þurfti að passa upp á að allir kettlingarnir fengju nóg að drekka úr spenum móður sinnar. Sum systkinanna eru nefnilega ákveðnari en önnur og því þarf að gæta þess að allir komist að. Það er ekki síður mikilvægt að mamman fái nóg að borða svo að hún hafi orku til að sinna börnunum.
Nói Síríus framleiðir páskaegg með hinum eina sanna Gretti á toppnum. Hann er gulur eins og öll fjölskyldan og því var tilvalið að leyfa vinum sælgætisgerðarinnar að velja nöfn á börnin fimm. Nóí Síríus birti myndir af kettlingunum á Facebook og barst fjöldinn allur af tillögum. Eftir að starfsfólkið hafði skoðað tillögurnar dag og nótt urðu nöfnin Grettir, Nói, Trítill, Tópas og Nóa fyrir valinu.
Glöggir áhorfendur hafa líklega tekið eftir því að núna sýna myndavélarnar aðeins neðstu hæðina og ekki er lengur stigi upp á næstu hæð. Þannig verður það þangað til kettlingarnir hafa náð ákveðnum þroska. Þá höfum við líka bætt við fjórðu myndavélinni svo hægt sé að fylgjast enn betur með fjölskyldunni.
Næstu dagar og vikur verða viðburðaríkar í lífi systkinanna. Framundan er tími þar sem þau taka út mikinn andlegan og líkamlegan þroska. Þau vaxa og dafna og læra svo margt nýtt.
Vanilla mun kenna þeim að gera þarfir sínar í kassa og borða og það er alveg eðlilegt að hún færi þá til með því að setja þá í kjaftinn. Engar áhyggjur, svona gera kisur.
Kettlingar eru mislengi að læra þessa hluti og það má alveg gera ráð fyrir að síðasti kettlingurinn verði ekki kassavanur fyrr en um átta vikna aldurinn. Með tímanum fer Vanilla að ýta þeim frá sér og er það ósköp eðlilegt. Hún er bara að kenna börnunum sínum að vera sjálfstæð og standa á eigin fótum í lífinu.
Keeping Up With The Kattarshians er framleitt af Skoti og Sagafilm. Verkefnið er unnið í samvinnu við Kattavinafélag Íslands, með fullri vitneskju og samþykki Matvælastofnunar, dýraeftirlitsmanns suðvesturumdæmis og dýralæknis gæludýra og dýravelferðar.