Flugvél Air Iceland Connect sem var á leið frá Reykjavík til Egilstaða í dag var snúið við eftir flugtak á fjórða tímanum í dag eftir að reyks varð vart í vélinni. Lendingin á Reykjavíkurflugvelli heppnaðist vel. Þetta kemur fram í tilkynningu lögreglunnar á höfuðborgarsvæðinu.
Þar segir að líklegt þyki að um vélarbilun hafi verið að ræða og að annar hreyfla vélarinnar hafi bilað. 44 farþegar voru um borð í vélinni ásamt áhöfn og engan sakaði. Öllum farþegum hefur verið hleypt frá borði.
Guðjón Helgason, upplýsingafulltrúi Isavia, segir í samtali við Vísi að vélin hafi lent á Reykjavíkurflugvelli skömmu eftir klukkan 15.
Neyðarstigi var lýst yfir vegna bilunarinnar og viðbragðsaðilar voru kallaðir til. Vinna þeirra gekk vel fyrir sig og nú hefur neyðarviðbúnaður verið afturkallaður.