Sepp Blatter tilkynnti í gær að hann muni stíga til hliðar sem forseti FIFA. Samkvæmt nýjustu fréttum rannsakar FBI stjórnartíð hans hjá sambandinu.
Geir Þorsteinsson, formaður KSÍ, var spurður í fréttum Stöðvar 2 um síðustu helgi hvernig maður Blatter er og hann sagði að hann væri mjög kænn.
„Hann hefur unnið dyggilega að framgangi knattspyrnunnar í 40 ár og hann hefur gert það vel og það eru allir sammála um það,“ sagði Geir.
Það var bara kominn tími til að hann stígi til hliðar og hann var búinn að lofa Evrópu því fyrir fjórum árum. Hann hefur heillað marga með sinni framkomu, það er alveg ljóst og hann er mikill leiðtogi.
Blatter var kjörinn forseti FIFA í fimmta sinn á ársþingi sambandsins í síðustu viku. Samkvæmt bandarísku fréttastofunni ABC er bandaríska alríkislögreglan FBI nú að rannsaka Blatter.
Sjá einnig: John Oliver hakkar FIFA í sig …Aftur!
Talið er að það sé ástæða þess að Blatter boðaði afsögn sína á blaðamannafundi í gær. Stuttu eftir uppljóstrun ABC birti New York Times frétt þar sem tekið er undir þá kenningu.
Blatter var endurkjörinn forseti FIFA á föstudaginn í síðustu viku í kjölfarið á því að níu fulltrúar í stjórn knattspyrnusambanda víða um heiminn voru handteknir, grunaðir um spillingu og fjárdrátt.
Blatter sjálfur heldur fram sakleysi sínu.