Hljómsveitin Rythmatik frá Suðureyri er sigurvegari Músíktílrauna í ár. Úrslitin fóru fram í Hörpu á laugardagskvöld. Hlustaðu á lag með hljómsveitinni hér fyrir neðan. Par-Ðar var í öðru sæti og AvÓkA í þriðja. SíGull var kosin Hljómsveit fólksins í símakosningu.
Hrafnkell Hugi Vernharðsson í Rythmatik var valinn gítarleikari tilraunanna, Magnús Jóhann Ragnarsson í Electric Elephant fékk viðurkenningu fyrir hljómborðsleik, Eyþór Eyjólfsson úr Pör-Ðum, SíGull og AvÓkA fékk verðlaun fyrir trommuleik og félagi hans í sömu hljómsveitum, Arnar Ingólfsson, verðlaun fyrir bassaleik.
Þórdís Björk Þorfinnsdóttir í C A L I C U T var valin söngkona tilraunanna og hljómsveitarfélagi hennar, Auðunn Lúthersson, var verðlaunaður sem rafheili tilraunanna. Hljómsveitin Par-Ðar fékk viðurkenningu fyrir textagerð á íslensku.
Hljómsveitina skipa þeir Hrafnkell Hugi Vernharðsson, Valgeir Skorri Vernharðsson, Pétur Óli Þorvaldsson og Bjarni Kristinn Guðjónsson. Þeir eru allir á aldrinum 19 til 24 ára.
Á vef Músíktilrauna kemur fram að fyrstu drög að hljómsveitinni mynduðust 2012 þegar að bræðurnir Valgeir og Hrafnkell reyndu að semja saman og ætluðu að stofna hljómsveit. Brösulega gekk að finna aðra meðlimi en Rythmatik var ekki komin í þá mynd sem að hún er í dag fyrr en í fyrra.
Hér má heyra lagið Tiny Knots eftir sigurvegarana: